அரபி படிக்கலாமே!

தமிழகத்தில் பன்னிரெண்டாம் வகுப்பு அரசு பொதுத்தேர்வுகள் முடிந்து தற்போது மாணவர்களும், பெற்றோர்களும் முடிவுகளை எதிர்நோக்கி உள்ளனர். பன்னிரெண்டாம் வகுப்பிற்குப் பின் மேற்படிப்புகளை எப்படித் தொடரலாம், எங்கே தொடரலாம் என்று ஆங்காங்கே கல்வி ஆலோசனை முகாம்கள், கையேடுகள், குறுந்தகடுகள் என பல வகையிலும் விழிப்புணர்வுகள் ஏற்படுத்தப்படுகின்றன. தற்போது வேலைவாய்ப்புகளை அள்ளித்தரும் துறை தகவல் தொடர்புத் துறையா? மருத்துவமா? உயிர்-வேதியிலா? என்று பலரும் ஆலோசனைகள் செய்து கொண்டிருக்கக்கூடும்.

தற்போது தேர்ந்தெடுத்துப் படிக்கப்போகும் மேற்படிப்புதான் மாணவர்களின் எதிர்கால வாழ்க்கைக்கு வெற்றியின் வழிகாட்டிகாக அமையக்கூடும். வளைகுடாவில் இருக்கும் பெற்றோர்களுக்கான ஒரு சிறிய ஆலோசனைதான் பின்வரும் குறிப்புகள்:

உங்களுடைய பிள்ளைகள் மருத்துவம், பொறியியல் சார்ந்த மேற்படிப்புகளைத் தொடர தேவையான மதிப்பெண்கள் இல்லையெனில் அவர்களை ஏதாவது ஒரு படிப்பில் சேர்ப்பதைவிட இளங்கலை அராபிக் (BA. ARABIC) பட்டப்படிப்பில் சேர்த்து விடுங்கள்.

வளைகுடா நாடுகளில் அராபிக் மொழி தெரிந்தவர்ளுக்கு நிர்வாகம், மொழிபெயர்பு, மேற்பார்வையாளர் ஆகிய பல துறைகளிலும் வேலை வாய்ப்புகள் மிகுந்து கிடக்கின்றன.

அரசுத் துறை வேலைவாய்ப்புகளனாலும் சரி, தனியார் நிறுவனங்களானாலும் சரி அராபிக் தெரிந்திருப்பின் அவர்களுடைய எதிர்காலம் பிரகாசமடையும் என்பதை வளைகுடா நாட்டில் பணிபுரியும் ஒவ்வொறுவருக்கும் தெரிந்த உண்மையே.

உங்களுடைய பிள்ளைகளின் வேலைவாய்ப்புகளை வளைகுடா நாட்டில் அமைத்துத் தர நீங்கள் விரும்புபவராக இருப்பின் அவர்களை இளங்களலை அராபிக் (BA. ARABIC) படிக்க ஆர்வமூட்டுங்கள். மூன்று வருட இந்த படிப்பிற்குப் பின் 2 வருட பட்ட மேற்படடிப்பான முதுகலை அராபிக் படித்தால் இன்னும் அதிகமான வேலைவாய்ப்புகள் அவர்களுக்காகக் காத்திருக்கின்றன என்றே கூறலாம். BA.Arabic படிக்கும் போதே கம்ப்யூட்டர் மற்றும் ஆங்கிலப் புலமையை சற்று அதிகப்படுத்திக் கொள்ள வேண்டும்.

BA. Arabic படிப்பை படிக்க ஆர்வமூட்டுவதன் காரணம், முஸ்லிம் சமுதாய சகோதரர்கள் கம்ப்யூட்டர், பொறியியல், ஆகிய பல படிப்புகளையும் படித்துவிட்டு வளைகுடா நாடுகளில் வந்து சாதாரண பணியாளர்ளுக்குக் கிடைக்கும் ஊதியத்தைவிட மிகக் குறைந்த ஊதியத்திற்கு பணிபுரியும் நிலை நிலவி வருகின்றது. அரபி மொழி எழுதவும், படிக்கவும் தெரியாத காரணத்தால் போதிய கல்வித்தகுதி இருந்தும் அதற்குத் தகுந்தாற் போல வேலைவாய்ப்புகள் அமைவதில்லை.

வளைகுடா நாடுகளைப் பொறுத்தவரை மத்திய கிழக்கு நாடுகளான எக்ப்தியர்கள், லெபனான், சிரியா, யமன் மற்றும் பல பகுதிகளிலிருந்தும் வேலைவாய்ப்புகளுக்காக மக்கள் அணிதிரண்டு வருகின்றார்கள். எந்த அடிப்படைக் கல்வித்தகுதியும் அவர்களிடத்தில் இல்லை எனினும் மொழி அடிப்படையாகக் கொண்டு அவர்கள் தங்கள் வேலைவாய்ப்புகளை சிறந்ததாக தக்கவைத்துக் கொள்கின்றனர். எனினும் அவர்களுக்கு இலக்கண மற்றும் இலக்கிய நடையில் அலுவலகம் சார்ந்த கடிதங்கள் மற்றும் ஆவணங்களை உருவாக்க இயலாதவர்களாகத்தான் இருக்கின்றனர்.

நம் சமுதாயத்தவர்கள் அராபிக் மொழிப்பாடத்தை பிரத்யேக மேற்படிப்பாக தேர்ந்தெடுத்துப் படித்தால் கண்டிப்பாக அவர்களுடைய வேலைவாய்ப்புகள் சிறந்ததாக அமையும் என்பதில் எள்ளவும் சந்தேகமில்லை.

BA. Arabic இளங்கலைப் படிப்பு திருச்சி ஜமால் முஹம்மது கல்லூரி மற்றும் சென்னை நீயூ காலேஜ் ஆகியவற்றில் இருக்கின்றது.

-அப்துல் அஜீஸ். எம்.ஏ(அராபிக்)