தி.நகரில் தருமிக்கு என்ன வேலை?

தருமியின் சென்ற மாதப்பதிவில்”குண்டு எல்லாம் எதற்கு?” என்ற நாத்திகப் பதிவைக் காண நேர்ந்தது. உடனடியாக நாமும் கொஞ்சம் பகுத்தறிவைக் கொட்டி எதையாச்சும் பொதுநல நோக்கில் எழுதலாம் என்று ஆசைதான். ஆண்டு விடுமுறையில் ஊருக்குச் செல்லும் பரபரப்பில் இருந்ததாலும் தருமி தான் கடைசியாக வாங்கிய நோக்கியா போனை விட்டு இனி வேறெங்கும் செல்லப் போவதில்லை :-) என்ற நம்பிக்கையில் ஆறஅமர எழுதிக் கொள்வோமே என்று அப்பதிவுக்கான பின்னூட்டங்களை மட்டும் வாசித்து வந்தேன்.

பலரும் பல்வேறு கருத்துக்களைப் பகிர்ந்து கொண்டிருந்தார்கள்.மசூதியில் வெள்ளிக்கிழமை தொழுகை நடத்துவதை சட்டமீறலாகவும் அதை சகித்துக் கொள்ளும் மனநிலைக்கு மக்கள் வந்து வெகுகாலமாகி விட்டதென்றும் தங்கள் ஆற்றாமையைப் பகிர்ந்து கொண்டிருந்தார்கள். பாவம் சமய சகிப்பாளர்கள்! பரபரப்பான யுகத்தில் முஸ்லிம்கள் தொழுகை நடத்துவதால் சிரமப்படும் முஸ்லிம் அல்லாதவர்களையும்,நாத்திகர்களையும் நினைத்தால் பரிதாபப் படவேண்டும்.

சர்.தியாகராயர் நகர் என்பதை தி.நகர் என்று சுருக்கிப் புரிந்துகொள்ளும் அவசர யுகத்திலும் உஸ்மான் சாலை,ஹபீபுல்லா சாலை என்று ஒருசில முஸ்லிம் பெயர் கொண்ட (தாலிபான்?!?) சாலைகளை இன்னும் அப்படியே விட்டு வைத்திருப்பதற்காக இந்து தேசபக்தர்களுக்கு கண்டிப்பாக நன்றி சொல்ல வேண்டும்!

தருமியின் பதிவைப் பற்றி சொல்ல வந்துவிட்டு எங்கோ சென்றுவிட்டேன். பொதுமக்களுக்கு இடைஞ்சல் என்ற நன்னோக்கில் எழுதப்பட்ட பதிவில், அதுவும் முஸ்லிம்கள் சாலையிலும் ஜும்ஆ தொழுவதால் ஏற்படும் இடைஞ்சல் பற்றி எழுதப்பட்ட பதிவில் பிரபல சமூக (?) ஆர்வலரும் இஸ்லாமிய விமர்சகருமான நேசகுமார் பின்னூட்டாமல் இருந்தால் அந்தத் தொகுதிக்காரர் என்று சொல்லிக் கொள்வதில் அர்த்தமில்லை. (எஸ்.கே முன்பு கற்பனையில்(!) சொல்லியிருந்தபடி நேசகுமார் நுங்கம்பாக்கம்வாசி! அனேகமாக இது தி.நகர் தொகுதியில்தான் வரும் என்று நினைக்கிறேன்). அவர் சொல்கிறார்:

“தருமி,நல்ல பதிவு. இப்படி நடுரோட்டில் தொழுகை செய்வது ஒரு விதமான மதவிளம்பரம். பர்தா போடுவது, மீசையை மழித்து தாடியை நீளமாக வைத்துக் கொள்வது – இது போன்ற ஒருவிதமான அட்வர்டைஸ்மன்ட்.

உடனடியாக இந்து மதம் பற்றி கேள்வி எழும் என்பதால் அதையும் சொல்லி விடுகிறேன். உச்சஸ்தானியில் லவுட் ஸ்பீக்கரில் அலறுவது குரானாக இருந்தாலும், எல்.ஆர்.ஈஸ்வரியாக இருந்தாலும் தவறுதான். விடியற் காலையில் கேட்கும் அபஸ்வரம் கோவிலிலிருந்து வந்தாலும், மசூதியிலிருந்து வந்தாலும் தவறே.

மற்ற மதத்துக்காரர்கள் அதே தவறைச் செய்யும்போதுதான் நமக்கும் புரிகிறது. என்ன செய்வது?

மும்பையில் இப்படித்தான் தெருவை மறித்து முஸ்லீம்கள் தொழுகை செய்வதைப் போல சிவசேனாக்காரர்கள் தெருவில் ட்ராஃபிக்கை நிறுத்தி ஆரத்தி செய்ய ஆரம்பித்தனர். உடனடியாக கலவரம் ஆரம்பித்தது.”

மொட்டைத்தலைக்கும் முழங்காலுக்கும் முடிச்சு போடுவது எப்படி என்று நேசகுமாரிடம்தான் கேட்க வேண்டும். முஸ்லிம்கள் ஐவேளை தொழ அழைக்கும் பாங்கொலியும் L.R.ஈஸ்வரியின் கற்பூர நாயகியே கனக வல்லியோ அல்லது குன்றத்திலே குமரனுக்கு கொண்டாட்டம் கும்மிப் பாட்டும் ஒன்றா?

முஸ்லிம்கள் லவுட் ஸ்பீக்கரில்தான் பள்ளிக்குத் தொழ அழைக்க வேண்டும் என்று எந்தக் கட்டாயமும் இல்லை என்பது வேறு விசயம். அப்படியே முஸ்லிம்கள் லவுட் ஸ்பீக்கரில் அழைக்காமல் இருந்து விட்டால் மட்டும் பொதுமக்கள்? செவிக்கு இடைஞ்சல் இல்லாமல் இருந்து விடுமா என்ன?

போக்குவரத்திற்கு இடையூறாக தொழுகை நடத்துதை வேண்டுமானால்
குறையாகச் சொல்லலாம். (ஒரு சில நிமிடங்கள் அமைதியாக தியானம் செய்வதை இடையூறு என்று சொன்னால், நிரந்தரமாக சாலைகளை ஆக்கிரமித்திருக்கும் தெருக்கோவில்களையும் திடீர் பிள்ளையார்களையும் என்னவென்று சொல்வது?) முஸ்லிம்கள் முடிந்தவரை இத்தகைய தற்காலிக இடையூறுகளையும் தவிர்க்க வேண்டும். சம்பந்தப்பட்ட பகுதியுலுள்ள முஸ்லிம்கள் இவ்விசயத்தில் மாற்று மதத்தவரின் கருத்துக்கு மதிப்புக் கொடுக்க வேண்டும் என்று சொல்வதில் நியாயமிருக்கிறது.

பர்தா,தாடி,மீசையெல்லாம் கூட நேசகுமார் போன்றவர்களுக்கு இடைஞ்சலாக இருக்கிறதாம்! ஒருவிதமான அட்வர்டைஸ்மெண்டாம்!! ஆகவே, முஸ்லிம் விளம்பரதாரர்களே இனிமேல் தயவு செய்து மீசையை வளர்த்தும், தாடியை ஷேவ் செய்தும், பெண்கள் பர்தா அணியாமலும் இருந்து நேசகுமார், தருமி போன்றவர்களுக்கு இடையூறு செய்யாதீர்கள்!

சமூக அக்கறையில் எழுதுவதாக நம்பச் சொல்லும் தருமி மாதிரியான என்றாவது குடிக்கும் பழக்கமுள்ள நாத்திகராக இருந்தாலும்கூட முஸ்லிம்களின் தொழுகைக்கான பாங்கொலி இவர்களின் பகுத்தறிவு செவிக்கு இடைஞ்சலாகக் கேட்கும்! அண்ணா மேம்பாலத்திலிருந்து சிம்ஸன் வரைக்கும் இருக்கும் ஆபாச சினிமாப் போஸ்டர்கள் மற்றும் அரைகுறை ஆடை விளம்பரங்களால் பொதுமக்களின் விழிகளுக்கு இடைஞ்சல் என்று யாராவது சொல்லிவிட்டால் அவ்வளவுதான்! நீங்கள் பெண்ணுரிமைக்கு எதிரான ஆணாதிக்க+மதஅடிப்படைவாதி என்று தனிமை படுத்தப்படும் அபாயம் உண்டு! எப்படித்தான் இத்தகைய நிரந்தர இடையூறுகள் பாழாய்போன பகுத்தறிவுக் கண்களுக்குப் படாமல் இருக்கின்றனவோ!

இத்தனை இடைஞ்சல்களையும் சகித்துக் கொண்டிருக்கும் திருவாளர் பொதுஜனம் யார்? அவர்கள் ஏன் முஸ்லிம்கள் வீதியில் தொழும்போதும், இந்துக்கள் மசூதிக்கருகில் தாரை தப்பட்டையுடன் வினாயகருக்கு சதுர்த்தி எடுக்கும் போதும்,அதிகாலையில் மணியடித்து சூலமங்கலம் சகோதரிகளின் பாடலைப்போட்டு பூசை செய்யும் போதும், கிறிஸ்தவர்கள் அமைதியாக திருஓலை ஏந்தி ஜெபப்பாடல்களைப் பாடிச்சென்றாலோ பொறுத்துக் கொள்ள வேண்டிய அவசியம் என்ன வந்தது ? என்று என்றைக்காவது யோசித்து இருக்கிறோமா?

மாட்டோம். ஏனென்றால் நாமெல்லாம் சமய சகிப்பாளர்கள் !

அப்படீன்னா தருமியும் நேசகுமாரும் யார் என்கிறீர்களா? யாருக்குத் தெரியும் அந்த ஆண்டவனுக்கே வெளிச்சம் !