ஹைதராபாத் குண்டு வெடிப்பு

நேற்று முன்தினம் ஹைதராபாதில் நடந்த குண்டு வெடிப்பில் வழக்கம் போல் ஏதேனும் ஒரு முஸ்லிம் பெயரிலுள்ள தீவிரவாத அமைப்பைச் சொல்லி வழக்கம்போல் விசாரனை முஸ்லிம்களைச் சுற்றியே இருக்கப் போகிறது என்பதில் சந்தேகம் இல்லை!ஒவ்வொரு குண்டு வெடிப்பிற்கும் பின்னணியில் பயங்கர சதித்திட்டங்கள் உள்ளன. எப்பொழுதெல்லாம் குண்டு வெடிப்பு நிகழ்த்தப்படுகிறதோ, அதற்கு முன்/பின் ஏதேனும் பரபரப்பான விசயம் இருக்கிறது என்பதைப் பலரும் கவனித்திருக்கலாம்.

அமெரிக்க-இந்திய அணுசக்தி உடன்பாட்டினால் காங்கிரஸின் குடுமி, இடதுசாரிகளின் பிடியில் அகப்பட்டுக் கொண்டுள்ளது. “என்ன பந்தயம்? தற்கொலை பண்ணிக் கொண்டு முதலில் நான்தான் சாவேன்” என்பதுபோல் உள்ளது ஆளும் மன்மோகன் அரசின் அமெரிக்க அடிமைத்தன உடன்படிக்கை! ஆகவேதான் காங்கிரஸ் தவிர்த்த அரசியல் கட்சிகள் அமெரிக்காவின் 123 ஒப்பந்தத்தை எதிர்க்கின்றனர்.

123 ஒப்பந்தத்தினால் இந்தியாவிற்குக் கிடைக்கும் நலன்களைவிடப் பன்மடங்கு நலன் ஈரானிலிருந்து பாகிஸ்தான் வழியாக இந்தியாவிற்கு பைப்லைன் மூலம் எரிவாயுவைக் கொண்டுவரும் திட்டம் இருந்தது. ( மேலும், 123 ஒப்பந்ததை விட ஐந்து மடங்கு குறைவான செலவில், முப்பது மடங்கு பலன் கிடைக்க வாய்ப்பிருந்ததாக பொருளியல் வல்லுனர்கள் அவதானித்தார்கள். இஸ்லாமாபாத்தில் நடந்த பத்திரிகையாளர்கள் கூட்டத்தில் பேசிய அப்போதைய பெட்ரோலியத்துறை அமைச்சர் மணிசங்கர ஐயர், அமெரிக்காவின் எச்சரிக்கையை இந்தியா அலட்சியபடுத்தி இத்திட்டத்தில் இறங்கும் என்று கூறினார். அமெரிக்காவின் தந்திரத்தாலும் காங்கிரஸின் அமெரிக்க எஜமான விசுவாசத்தாலும் பைப்லைன் ப்ராஜெக்ட் ஏறத்தாழக் குப்பைக் கூடைக்கு அனுப்பப்பட்டு விட்டது!

ஒன்றுக்கும் உபயோகமற்ற இராமர் பாலத்தை வைத்து மதவாத அரசியல் செய்து, எஞ்சியிருக்கும் சொற்ப காலத்தை ஓட்டலாம் என்றிருந்த பா.ஜ.க வுக்கு, திருப்பதி பஞ்சாமிர்தம் கிடைத்ததுபோல் அமெரிக்காவின் 123 ஒப்பந்தம் கிடைத்துள்ளது. முடங்கிக் கிடந்த பா .ஜ.க பெருந்தலைகள் சற்று உற்சாகம் பெற்றிருப்பதை அரசியல் வட்டாரத்தில் காண முடிகிறது.

இந்தச்சூழலில்தான் ஹைதராபாதில் நடந்த குண்டு வெடிப்பிற்கு ஹர்கத் உல் ஜிகாதி என்ற பாகிஸ்தான் மற்றும் பங்களாதேஷ் ஆதரவு பெற்ற தீவிரவாத அமைப்புகள்தான் காரணம் என்று ஒருசில மணித்துளிகளுக்குள் முதல் கட்ட புலணாய்வுத் தகவல்கள் கசியத் தொடங்கி விட்டன .

சம்பவ இடத்தைப் பார்வையிட்ட வெங்கையா நாயுடு, உள்நாட்டுப் பாதுகாப்பு விசயத்தில் மெத்தனமாக இருக்கும் காங்கிரஸைச் சாடினார். திருவாளர் அத்வானி , “மீண்டும் பொடா சட்டம் கொண்டுவரப்பட வேண்டும்” என்று திருவாய் மலர்ந்தார்! குண்டு வெடிப்பைக் காரணம் காட்டி திருப்பதி , காளஹஸ்தி கோவில்களுக்கு வரலாறு காணாத பாதுகாப்புப் போடப்பட்டு உள்ளதாகவும் தமிழகத்திலும் கோவில்களுக்கு பாதுகாப்பு போடப்பட்டு பஸ், இரயில் பேரூந்து பயணிகள் மிகுந்த சோதனைகளுக்கு உள்ளாக்கப் படுவதாகவும் தலைப்புச் செய்திகளில் சொன்னதோடு , சுமார் 700 பேரை சந்தேகத்தில் கைது செய்திருப்பதாகவும் சொன்னார்கள்.

இனி ஓரிரு வாரங்களுக்குத் தீவிரவாதிகளை ‘வலைவீசி’த் தேடும்பணி முடுக்கி விடப்படும். தனிப்படை அமைக்கப்பட்டு சம்பந்தப்பட்ட /படாதவர்கள் விசாரணை வளையத்தில் கொண்டு வரப்படுவார்கள்.

சரி, இந்த குண்டு வெடிப்பை யார்தான் செய்திருப்பார்கள்? வழக்கம்போல் முஸ்லிம்கள்மீது பழியைப் போட்டு அடையாளமாக ஒருநாள் பந்த் அல்லது இறந்தவர்களுக்கு இழப்பீடு மற்றும் அரசு வேலை என்று அறிவித்து விட்டால் எல்லாம் சரியாகி விடும
ா ?

முந்தைய குண்டு வெடிப்புகள் ஏதேனும் விசேஷ தினங்களில்தான் நடத்தப் பட்டன. மும்பை ரயில் குண்டு வெடிப்புகள் தீபாவளியன்றும், மாலேகான் குண்டு வெடிப்புகள் முஸ்லிம்களின் ஷபே பராஅத் இரவன்றும் நேற்றைய குண்டு வெடிப்பு ஓணம் திருநாளின் போதும் நடந்துள்ளதை கவனத்தில் கொண்டால் குண்டு வெடிப்புகளினால் பொதுமக்களை அச்சுறுத்திப் பலன் பெறும் நோக்கம்தான் தெரிகிறது. அரசுக்கு எதிராகச் செயல்படும் தீவிரவாத அமைப்புகள் பொதுமக்களைப் பகைத்துக் கொள்ளும் இத்தகைய நிகழ்வுகளைச் செய்வார்களா? என்பதைச் சிந்தித்துப் பார்க்க வேண்டும் .

ஆந்திராவில் இந்தகைய குண்டு வெடிப்புகளை வழக்கமாக நடத்தி வரும் நக்ஸலைட்டுகளைப் பற்றி ஏதும் சொல்லாமல் வாயில் நுழையாத ஹர்கத் உல் ஜிகாதி என்ற அமைப்புதான் காரணம் என்றச் செய்தியைக் கசிய விட்டது முஸ்லிம்களை மீண்டும் தனிமைப் படுத்தும் நோக்கம் என்றே சந்தேகிக்க வேண்டியுள்ளது. இன்னொரு பக்கம், காங்கிரஸின் மீதான அமெரிக்க ஆதரவு இமேஜை திசை திருப்பும் அவசியம் மற்றும் அரசியல் அநாதைகளுக்குப் பிழைப்பு நடத்த , வெறும் வாய்க்குக் கிடைத்த அவலாகவும் இந்தக் குண்டு வெடிப்பு அமைந்துள்ளது.

உண்மைக் குற்றவாளிகள் கண்டு பிடிக்கப்பட்டு, அவர்கள் கடுமையாகத் தண்டிக்கப்பட வேண்டும்.